que on ne … Il n’a bele uevre en tot le mont</br>que on ne puist dedens trover</br>et se g'i fal à l'aconter,</br>ne vos en devés mervellier</br>car il a gens de maint mestier</br>en la vile qui uevres font.</br>Li uns fait dras, l'altres les tont,</br>li uns foule, li autres taint.</br>Cil fait sollers et cil les paint, </br>cil fait botes et cil hosiaus.</br>Cil peletier batent lor piaus,</br>cil les eskeut et cil les tent,</br>cil om les talle et cil les vent.</br>Cil fait lorains et estereus.</br>Asés i a de menestreus.</br>Li uns fait frains, li autres seles</br>d'asur pointes, rices et beles,</br>et cil autre refont escus.</br>Lances pointes et fers molus </br>i font cil autre menestrel.</br>Ja n'en entrisciés en ostel</br>ù il n'eüst marceandise.</br>Cotiax i font de mainte guise,</br>s'en i trovast on, quis quesist.</br>Cil fait hiaumes, cil les forbist,</br>cil fait haubers et cil espees.</br>Cauces de fer molt bien ovrees</br>veïsciés as fenestres pendre.</br>Onques rien ne fist Dex qu'a vendre </br>ne trovisciés en cel castel :</br>fremal ne çainture n'anel</br>n'almosniere ne dras de soie,</br>pine d'ivorie, que diroie ?</br>Nus ne puet le ricece dire.</br>Cil vent le poivre et cil le cire,</br>cil vent le poit et cil comin,</br>cil vent encens alixandrin,</br>cil vent boistes a onguement.</br>Teus se fait mire qui lor ment </br>et tex lor dist qu'il set fisique</br>quis tient a fols plains de musique.</br>Mais il le fait por sa mere vendre, </br>si fait au fol de langue entendre</br>qu'il le garra de l'idropie. </br>Plains est cil de melancolie</br>qui par mire en cuide garir.</br>Mire sevent trop bien mentir</br>et mout bien lor mençogne cuevrent.</br>Or vos dirai de çaus qui uevrent</br>copes d'or et hanas d'argent, </br>culliers, calices que on vent</br>as provoires de ces mostiers.</br>Cil cange, cil est monïers,</br>cil fait borses et cil fait dés,</br>cil fait orfrois estrois et lés,</br>de plusors guises, gens et biax. </br>Ces damoiseles font fresiax,</br>braiels, çaintures, dras de soie.</br>Qui s'esteüst enmi la voie,</br>mervelles i veïst le jor.</br>Maserins font cil torneor, </br>juistes, boistes et escüeles.</br>Cil fait harpes et cil vïeles,</br>cil fait fleces, cil est arciers,</br>Cil talle dras, cil est cauciers,</br>Cil fait graius et cil trepiés.</br>Li uns fait claus et fers a piés,</br>cil fait hapes et cil serures</br>et cil fait orceus et fremures,</br>cil fait les pos et cil caudieres,</br>paieles bien bones et cieres,</br>que l'uevre n'estoit pas onie.</br>Cil fait toniax et cil les lie,</br>cil fait kevestres et estrilles</br>et cil gouces et cil kevilles.</br>Li uns vent pain, li altres vin.</br>Asés i a des le matin</br>Dusque al soir oiseax et poissons,</br>et car de porc et venisons</br>trovast on en la bocerie.porc et venisons