Voir la source de List:158

{{BDPolima
|Nom auteur=Anonyme
|Titre=Le Dit des monstiers
|incipit=J’ay commencié a Nostre Dame
|Liste=Liste avec retours à la ligne
|Periode=1275-1300
|Langue=Langue vernaculaire
|Nation=FRANCE
|Typologie=Dits et fabliaux
}}
{{Manuscrit
|Ville=PARIS
|Istitution=Bibliothèque nationale de France, Manuscrits
|CoteManuscrit=BnF fr. 12483
|Support=parchemin
|Support 2=codex
|Folio=127
|verso=non
|Image=Monstiers 127ra.jpg
|Transcription=Pour ce que j’ai fet mencïon
Des eglises ou devocion
Est plus monstree qu’en autre lieu,
Quar la repose li cors Dieu,   
Des monstiers qui a Paris sont
Et de quiex sains il feste font,
Les lieus vous dirai et le nombre,
S’a nombrer Sathan ne m’encombre.
Un gentil homme m’otroia
Son hostel, et si me proia	
Que je pour s’amour tant feïsse
Que trestous les monstiers meïsse
De Paris en rime et en dit.
Isnelement, sans contredit,
Pour l’amour de lui m’entremis,
Si les ai tous en rime mis.
J’ay commencié a Nostre Dame, 
Qui nous sauve et gart cors et ame,
Pour ce que c’est la mere esglise
De Paris. Aprés, de ma guise,
Pres le monstier Saint-Johan-le-Ront : 
Entre euz deuz n’a ne val ne mont ;
Et aprés Saint Denis du Pas
Ne Saint Aignien n’oubliie pas,
Et puis la chapele as noctaires,	
Ou il repaire mains vicaires.
Et puis aprés la Maison Dieu
De Paris, ou a digne lieu. 
En Rue Noive, pas ne grieve,
Le monstier Sainte Genevieve
La Petite, que je ne faille.
Devant celle esglise, sans faille,
Vent on chapons, gelines, cos,
Perdris, plouviers et vuidecos.
Aprés le monstier Saint Christofle,	
Qui de l’amour Dieu fist son coffre
Quant le porta outre la mer :
Servir le devons et amer.
Entour vent on fourmages, oefs.
Pres d’ilec siet Saint Pierre as Buefz
Et le monstier Sainte Marine
Qui ne siet pas sur la marine.
C’est veritez que je vous di.
}}
{{ImageManuscrit
|Folio=127
|ImageM=Monstiers 127rb.jpg
|verso=non
|Transcription_Manuscrit=Et puis aprés la Magdalainne
Qui vers Dieu ne fu pas vilainne :
De ses larmes ses piez lava,
De ses pechiez Dieu la lava.
Aussi nous veille il pardonner
Les nos et sa grace donner !	
Folz est qui sa grace n’achate.
Aprés Saint Denis de la Chartre, 
Aprés est Saint Symphorien
En une place seant bien 
Ou bout de la Peleterie :
Devant fait on boulengerie.
Et ou bout de la rue aus Fevres
Ou il demeure pou d’orfevres
Qui facent calices ne crois :
La siet le monstier Sainte Crois,
Aprés Saint Pierre des Arsis,
Entre les Drapiers est assiz.
Et Saint Mathyas siet aprés
Qui des Savetiers est bien pres :
Plusieurs sont si paroissïen,
Que c’est un monstier ancïen.
Et Saint Germain, que que nus die 
Le Viel, siet prés de l’Orberie,
Et puis le monstier Saint Michiel,
Qui nous conduise tous ou ciel.
Puis le monstier a un cors saint,
Saint Eloy ou malade et sain
Vont souvent nus piez et deschaus,
Qu’il est mires et mareschaus
De mainte cruel maladie :
Ne croy que nus [nul] mal en die.
Pres d’ilec siet une chapele
Qui moult est digne et riche et bele ::
C’est la chapele nostre roy
Ou de biauté a grant arroy
Et de richesse ; y a grant masse
De reliques en une chasse
As quiex l’en doit porter honneur
Pour l’amour de nostre Seignieur ;
Sa crois, sa coronne et li cleu    
Laiens sont mis en noble lieu,
Et si i sert on noblement Dieu
}}
{{ImageManuscrit
|Folio=127
|ImageM=Monstiers 127vc.jpg
|verso=oui
|Transcription_Manuscrit=Qui siet devant le grant Palais;
Mes cheüs est, donc est plus lais: 
C’est veritez que vous despont.
Or m’en iray outre le pont
Pour des autres monstiers trouver
Que l’en ne puisse reprouver
Quar s’en mon dit faille de rien.
Premiers trouverez Saint Julien
Le Povre, et bien ai regardé
Que maint compaignon a gardé
De mort, ce n’est pas mesprison,
Et d’estre en vilainne prison ;
Il les herberge et si les tence :
De herbergier a la poissance.
Et puis la chapele Saint Blaive,
Qui pour Dieu morut a grant glaive.
Aprés oublïer ne doy mie	 
Saint Seurin, pour la ferperie
Qui est achetee et vendue,
En son quarrefour est tenue
De plusieurs manieres de gent
Qui s’en chevissent bel et gent.
Aprés est Saint Andrieu des Ars, 
Ou mainte dame de leurs ars
Ont maintes fois lancié et trait,
Et maint hommë a eulx atrait.
Aprés i rest Saint Augustin,
Ou l’en parole bien latin.
A Saint Germain des Prés m’en vois,
Ou l’en sert Dieu a haute vois.
Aprés est Saint Martin des Orges, 
Et puis aprés i est Saint Georges;
Aprés Saint Pere du Sablon
Et Saint Soupplis y asamblon.
Et puis aprés les Cordeliers,
De bon vin boivent volentiers.
Saint Cosmë et Saint Damïen:
Cy duy furent sirurgïen
Et mires a Dieu nostre pere :
Qui ce ne croit, il le compere.
Et puis aprés Saint Matelin.
Sus coutes et en draps de lin
Chainoigne nuit maint povre couche
}}
{{ImageManuscrit
|Folio=127
|ImageM=Monstiers 127vd.jpg
|verso=oui
|Transcription_Manuscrit=De Dieu soient tel gent benoit !
Aprés le monstier Saint Benoit
C’on apele le Bettourné.
D’ilec tantost m’en retourné
Au monstier des Hopitaliers
Que n’oublie pas volentiers.
Saint Hylaire est un pou avant ;
Sainte Gennevieve la grant
Y est, ou a riche abbaÿe;
Puis ay ma voië envaïe,
S’ay trouvé un monstier noblet
Que fist le cardounar Cholet.
Saint Symphorien le Petit,
Si siet au dessous un petit,
En la terre Saint Pierre ou Mont.
Li Navarrois nuef monstier ont.
Carmelite logié se sont
Un pou aval ; la moustier font.
Aprés Saint Estienne des Grez
Qui de Dieu servir fu engrez.
Devant sieent li Jacobin,  
Qui par païs vont bin et bin ;
Chapele y a de Saint Andrieu,
Qui fu moult grant ami de Dieu.
D’ilec alay a Nostre Dame
Des Champs, [y a] moignes par m’ame.
D’ilec au monstier Saint Marciau
Qui siet pres d’un petit ruissiau,
Saint Martin et Saint Ypolite:
Ceus ai je bien pris a eslite.
D’ilec ving au monstier Saint Marc ;
Puis, a la traitie d’un arc,
Est Saint Victor moult bien seans.
Puis li monstiers des Bons Enfans, 
Puis la chapele au Moinnios :
Demourer la plus je n’ i os.
Saint Bernart oublïer ne doy:
Saint Nicholas du Chardonnay;
Puis aprés la Sourbonnerie,
Que je ne doy oublïer mie.
Puis m’en reving tout sans effroy
Droit au monstier de Saint Lieffroy
Et a Saint Germain l’Aucerrois
}}
{{ImageManuscrit
|Folio=128
|ImageM=Monstiers 128ra.jpg
|verso=non
|Transcription_Manuscrit=D’ileques a Saint Nicholas 
Du Louvre et a Saint Thomas,
Et puis aprés je m’en revins
Par le monstier des .XV.Vins, 
Et au monstier Saint Honnouré,
Ou de bon cuer Dieu ai ouré.
D’ilec m’en ving a Saint Huitasse,
Pres des Hales, en digne place,
Et d’ilec a Saint Innocent,
Ou gist maint cors d’omme innocent.	
Et aprés a Sainte Oportune,
De clous guerit et d’apostume ;
Et puis a Sainte Katherine, 
Qui vierge fu pure enterine ;
Puis le monstier de Saint Magloire
Qui ama Dieu le roy de gloire,
Et assez pres de icel lieu
Est le sepulcre Dame Dieu.
Puis a Saint Leu et a Saint Gile,
Aussi voirs est comm’ evangile,
Et si vous di qu’a l’oposite
L’esglise de Saint Jacques est ditte
Que les confreres ont fondee
Par grant devocïon juree :
Sus la Grant Rue fondé l’ont.	
Certes moult biau seant resont
Li monstiers de la Trinité   
Ou le Seignieur de maiesté
Est bien servi a grant honneur.
Devant lui rest Saint Sauveeur	
Et les Filles Dieu sont après ;
Saint Ladres en est assez prés.
Puis m’en reving a Saint Lorens:
De cheminer ne fui pas lens.
Puis a Saint Nicholas des Chans,
Puis a Saint Martin, ou de[s] chans 
Servent li moigne JhesuCris. 
Au Temple ving, pas ne mespris,
Et puis aprés as Blans Mantiaus,
Ou l’en essuie a grans monciaus
Laine, et en la Bretonnerie
A une petite abbaïe
Que l’en apele Sainte-Crois,
[Dont les freres metent les crois]
}}
{{ImageManuscrit
|Folio=128
|ImageM=Monstiers 128rb.jpg
|verso=non
|Transcription_Manuscrit=Partie a blanc et a vermeil :
De ce pas moult ne me merveil.
Puis siet aprés une chapele
Dediee par miracle bele
D’un juif qui en son ostel
Boulli le sacrement d’autel,
Dont trouvez fu vermaus entiers.
Puis est li Vaus des Escoliers,  
Puis est Saint Pol, puis Nostre Dam[e]
Du Carme ; bien scevent leur ga[me].
Il ont pris leur lieu et leur estr[e]
Ou li Barré souloient estr[e], 
Et d’ileques ralez s’en sont
Sous Sainte Gennevieve ou Mo[nt].		
Aprés a, joingnant de la porte
De Barbel, a une grant porte,	
A un ostel de bonne gent
Ou il a monstier bel et gent:
Beguines et preudefames
Le los eschivent des diffames
Et les pechiez ors et mauvés.
D’ileuc m’en ving a Saint Gervé[s],
Ou il a gracïeus monstier
Pres de la porte Baudoier.
Dessous est Saint Jehan de Grèv[e] :
Li uns a l’autre rien ne greve.  
Un pou aprés icelle esglise
Une chapele y est assize		
Que fist faire uns riches hom :
Estienne Baudris ot a non.
Prestres et clers il y a mis,
Qui pour lui et pour ses amis
Sont ordenez a Dieu servir,
Qu’il puissent s’amour desservir:
Preudons fu cil, avoir ot bon.
D’ileuc ving au monstier Sain[t Bon]
Et de Saint Bon a Saint Marri,
La n’oi je pas le cuer marri ;
Saint Pere et saint Lenart ensem[ble]
Y sont aouré, ce me samble.
En la rue Aubri le Bouchier
A un monstier que moult ai chie[r]:
Saint Jossé oublier ne vueil.
[....... nommer vous vueil]
}}
{{ImageManuscrit
|Folio=128
|ImageM=Monstiers 128vc.jpg
|verso=oui
|Transcription_Manuscrit=Avant ce que ma bouche lie 
Saint Jaques de la Boucherie.
Tous les monstiers vous ai nommé		
De Paris, sans nul mesnonmé ;
Plus n’en y say, ce m’est avis,
Que bien y ay mis mon avis.
Je ne vueil pas mettre en mon conte
Chapeles aus dus et aus contes,
Ne a bourgois ne aus evesques,
N’a abbez ne a archevesques.
Je n’i mes que ceus proprement
Ou toute gent communement
Puet le digne service oïr
Dieu, dont on se doit esjoïr		
Et Dieu et sa mere proier,
Chascun pour son cuer supploier
Vers Jhesus Crist de leur tors fais
Et des pechiez que il ont fais.
Touz les autres ai arriere mis ;
Mes ceuls ci ai je en rime mis
Dont tous ensamble les vous nonme
Quatre vins et huit par droit nonbre.
Il n’en y a ne mains ne plus,
Se ce ne sont monstiers repus,
Fors le Saint Jaques monstier
Qui de nouvel fu fait l’austrier, 
Ou nul ne va ne ne repaire
Fors que cilz qui lez ont fait faire;
Mes li autre sont de autre guise 
Qui sont conmun au Dieu servise.
De grant leur vint devocïon
D’amour et de dilectïon
Qu’a Dieu et a sa mere avoient
Quant tant monstiers ediffïoient.
Il amoient Dieu de cuer fin
Et pour ce en ont louier sans fin ;
C’est la joie qui tous jours dure
A li desirrer met ta cure  
Jhesus nous en doint le vouloir
Qui du donner a le povoir.
A ce nous aist Dame Marie
Qui tous nous gart de vilennie.
}}
{{Deposant
|Nom du déposant=Madeleine Jeay
}}
{{Article
|Authorarticle=Wendy Pfeffer
|Titrearticle=Le Dit des monstiers
|revue=Speculum
|nombre=73
|Annéearticle=1998
|pagesarticle=80-114
}}
Liste de lieux : les monastères de Paris.